Жастар сарайының фойесіне төселген түрлі-түсті долақты алашаларды, көде шөптерді, қабырғаға ілінген украин стиліндегі сүлгілерді, күнбағыстан, көкнәрдан, кекіреден өрілген  гүлдестелерді көрген іс-шара қонақтары  украиндық хуторға енгендей болды.

Аудан тұрғындары қолөнер көрмесін ұйымдастырды. Мысалы, Қамысты кентінің әртістері қолөнер бұйымдарымен қатар, картоп, шие қосылып әзірленген вареник, сало әкеліпті. Ал кесте тігуге арналған машина көрменің айрықша экспонатына айналды.

«Зығыр матадан тігілген бұл жейдені менің таныстарым ұзақ уақыт бойы сақтап келеді, бұл киімді тың игеруге келген укранидықтар алып келген. Барлық өрнектері бисермен кестеленген. Олар бұл жейдеге қарап отырып Туған жерге деген сағынышын басады», - дейді Қамысты кентінің тұрғыны Ольга Комарь.

Халық әндерін нақышына келтіріп орындаған   украин фестивалінің тұрақты қатысушылары, Рудный қаласынан келген «Мрия» хоры көрермендердің ыстық  ықыласына бөленді. 

Қонақтар «Сорочин жәрмеңкесінде» қолөнер шеберлерінен  көздің жауын алатын бұйымдар, тіпті емдік шөптерден дайындалған шай  сатып алды.

Меркелік концерт барысында ұлтаралық бірліктің символына айналған, өмір ағашы-Бәйтеректің пайда болу тарихынан сыр шертетін әсем суреттер  көрсетілді. «Эстель» және «Зарянка» ансамбльдерінің бишілері қазақ және украин халық мәдениеттерінің тоғысатын сәттерін көрсетті.

Көрермендер бір жарым сағат бойы облыстың барлық аудандарынан келген шығармашылық ұжымдардың өнерлерін тамашалап, көңілдерін көтерді. Барлық әртістерге алғыс хаттар, ал көрме ұйымдастырған аудан өкілдеріне сыйлықтар табыс етілді.