Облыстық Достық үйінде вайнахтардың қазақ жетіне күштеп қоныс  аударылуының 75 жылдығына және шешен халқының танымал бишісі Махмуд Эсамбаевтың 95-жылдығына орай шешен-ингуш мәдениетінің күні аталып өтті.

Мереке аясында шешен-ингуш халқының болмысынан хабар беретін көрме ұйымдастырылды, іс-шара қатысушыларына чепалгаш күлшесі ұсынылды. «Вайнах» шешен-ингуш этномәдени бірлестігі төрағасының орынбасары Таус Хайдукаеваның айтуынша, бұл ұлттық тағам дастарқанның берекесі болып табылады.

«Күлшелердің тәтті де жұп-жұмсақ болып шығуының себебі, олар ірімшік қосылған қамырдан иленеді, майға қуырылғаннан соң қайнаған суға малынады. Біз мұндай күлшелерді жиі әзірлейміз. Чепалгаш күлшелері қазақ халқының бауырсақтары сынды дәстүрлі тағам» – дейді Таус Султановна.

Қонақтардың кейбіреулері Тау қызы таратып жатқан дәмі тіл үйірер күлшелерден дәм татып жатқанда екіншілері шешен-ингуш халқының ұлттық аспаптары мен тұрмыстық заттары қойылған көрмені тамашалады.

Этномәдени бірлестіктің төрағасы Эльбрус Тимаев вайнахтардың арулармен танысып, тіл табысу сырын ашып берді. Олар бұлақ басында танысады екен.

«Дөңгелек құмыра ұстаған қыз тұрмыс құрған, ал сопақ құмырамен су таситын қыздың басы бос болып есептеледі, бұл кавказ халқының ерекшелігі», - дейді бірлестік төрағасы.

Концертті тамашалауға жүзден астам көрермен жиналды. Биыл өзінің 80 жылдығын атап өткен Қостанай облысының атақты өнер қайраткері Владимир Рыдченко алғашқы қатардан орын алды. Ол бұл мерекенің басты қонағы, себебі ол 1983 жылы ең танымал бишілердің бірі, КСРО-ның халық әртісі Махмуд Эсамбаевтың облысымызға гастрольдік сапармен келуіне себепкер болған.

 «Махмуд Алисултанович ұшақтан түсіп, менен өзің қайда апаратынымды сұрады, мен оған Қостанай қаласынан 40 шақырымдық жерде орналасқан Рудный қаласына баратындығымызды жеткізіп, көлікке мініңіз деп ескі «Волгамды» нұсқадым. Биші менің машинама қарап: осыны көлік деп тұрсың ба, бұл трактор ғой!» деп күлімдеді. Дегенмен, біз іс-шара өтетін жерге дәл мерзімінде жеттік, концерт жоғары деңгейде өтті» - дейді өнерпаз.

Іс-шара барысында вайнах халқының тарихындағы қайғылы сәттер еске алынды. Биыл шешен-ингуш халқының қазақ даласына еріксіз қоныс аударғанына 75 жыл.

«Қонақжай қазақ еліне қоныс аударғанымыз біз үшін бақыт. Бүгінгі мерекенің лезгинкадан басталғаны көңіл қуантады, себебі бұл биді қазақтар да, орыстар да билейді. Өзара түсіністік пен сыйластықты сақтау үшін біз өз тарихымызды ұмытпауымыз керек. Біз Тәуелсіз  жолымызды сала бастағанда, көптеген азаматтар елден кетті, ал бүгінде қайтып оралып, өз кәсібін құрып жатыр, себебі елімізде бейбітшілік пен келісім орнаған», - дейді Эльбрус Тимаев.

Көрермендер әртістермен бірге әсерлі ән шырқап, мың бұрала жалынды би биледі. Концерттен кейін этномәдени бірлестік өкілдері жастары мерекені дәстүрлі ловзармен жалғастырды.