Ғылыми-сараптамалық топтың, Қоғамдық келісім кеңесінің, Аналар кеңесінің өкілдері қала мектептеріне барып, оқушыларды Қазақстан халқы Ассамблеясымен таныстыру мақсатында  ақпараттық сағаттар өткізді. Іс-шара достықтың қара шаңырағына айналған Ассамблеяның 25 жылдығына арналған.

«Біздің басты мақсатымыз – оқушыларды Ассамблеяның құрылу тарихымен, міндетімен таныстыру.  Спикерлер белгілі бір тақырып таңдап, дәріс оқыды. Мәселен, ғылыми-сараптамалық топтың төрағасы Әлімжан Бекмағамбетов этномәдени бірлестіктер туралы мәлімет келтіріп, олардың болмысы бейнеленген, қызметі белгіленген сайтты көрсетті,  сонымен қатар, ұлтаралық келісімнің маңыздылығын жеткізді», - деді «Қостанай облысы әкімдігінің «Қоғамдық келісім» КММ-нің бас сарапшысы Дарья Тимина.

Ғылыми-сараптамалық топтың мүшесі, тарих ғылымдарының докторы Дмитрий Легкий Қостанай қалалық № 19 орта мектептің оқушыларына Қазақстанда тұрып жатқан халықтарға ортақ тарихтан сыр шертіп, тәуелсіздік алғаннан кейін қазақстандықтардың бірлігін сақтау қажет болып, Елбасымыз – Нұрсұлтан Әбішұлы Назарбаевтың Қазақстан халқы Ассамблеясын құру жөніндегі шешім қабылдағанын жеткізді.

Іс-шараға Қазақстан халқы облыстық Ассамблеясы  ғылыми-сараптамалық тобының мүшесі, ҚХА Кеңесінің мүшесі, тарих ғылымдарының кандидаты, Ө. Сұлтанғазин атындағы ҚМПУ-нің жанындағы ҚХА кафедрасының профессоры Валерий Вишниченко, Қазақстан халқы облыстық Ассамблеясы ғылыми-сараптамалық тобының мүшесі, Ө. Сұлтанғазин атындағы ҚМПУ-нің жанындағы Қазақстан халқы Ассамблеясы кафедрасының меңгерушісі Ольга Евдокимова, ҚР ІІМ Ш. Қабылбаев атындағы Қостанай академиясының әдіскер-оқытушысы Данияр Әбенов және т.б. лекторлар қатысып, мазмұнды дәрістерін оқыды.

«20 мектептің жоғары сынып оқушылары үшін ақпараттық сағаттар ұйымдастырылды.  Әрбір дәрістен кейін Еріктілер қозғалысы орталығының («Білім» бағыты бойынша) еріктілері Анель Пимичеваның басшылығымен оқушыларға сан түрлі ойындар ойнатып, ұйымшылдыққа баулитын тренингтер өткізді, сондай-ақ, Қазақстан халқы Ассамблеясы туралы сұрақтарды қамтитын зияткерлік турнирлер ұйымдастырды», - деді Дарья Тимина.